សាខាកាកបាទក្រហមកម្ពុជា ខេត្តព្រះវិហារ បានបើកវគ្គ មូលដ្ឋាន ដល់យុវជន កាកបាទក្រហមកម្ពុជា
សាខាកាកបាទក្រហមកម្ពុជា ខេត្តព្រះវិហារ បានបើកវគ្គជាមូលដ្ឋានយុវជនកាកបាទក្រហមកម្ពុជា ជូនយុវជនកាកបាទក្រហមកម្ពុជាវិទ្យាល័យ ហ៊ុន សែន ហ្មសែត ចំនួន ៤០នាក់ និងយុវជនទើបរើសថ្មីចំនួន ៣២នាក់ ស្រី ២០នាក់ និងយុវជនកាយរឹទ្ធកម្ពុជា ចំនួន២៨នាក់ ស្រី២៥នាក់ ឋិតនៅភូមិហ្មសែត សង្កាត់ប៉ាលហាល ក្រុងព្រះវិហារ ក្រោមវត្តមានលោក តាន់ គឹមណេង ប្រធានកិត្តិយសក្លឹបយុវជនប្រចាំវិទ្យាល័យ និងជានាយកវិទ្យាល័យ ហ៊ុន សែន ហ្មសែត ។
នៅក្នុងឱកាសនោះលោកប្រធាន បានលើកឡើងថា ដើម្បីបន្ថែមសមាជិកយុវជនដែលបានប្រឡងជាប់ហើយទៅបន្តការសិក្សា សាលាបានរើសយុវជនបំពេញ និងបើកវគ្គជាមូលដ្ឋានយុវជនកាកបាទក្រហមកម្ពុជា ជូននាពេលនេះគោលបំណងដើម្បីអោយប្អូនបានដឹងអំពីប្រវត្តិគោលការណ៍គ្រឹះ ចលនាអន្តរជាតិកាកបាទក្រហម អឌ្ឍចន្ទក្រហម តួនាទីរបស់យុវជនកាកបាទក្រហម ពិសេសវិជ្ជាសង្គ្រោះបឋម ។ ជាមួយគ្នានោះដែរក៏បានធ្វើការផ្តាំផ្ញើដល់ប្អូនៗត្រូវខិតខំ៖
-រៀនសូត្រអោយក្លាយជាកូនល្អ សិស្សល្អ មិត្តល្អ
-ជៀសអោយឆ្ងាយពីគ្រឿងញៀន
-គោរពច្បាប់ចរាចរណ៍អោយខ្ចាប់ខ្ជួន
-ចូលរួមថែរក្សាអនាម័យនិងសំអាតនៅសាលានិងតាមកន្លែងផ្សេងៗ
-ជៀសវាងការប្រើប្រាស់អំពើហឹង្សា
-ជួយកិច្ចការផ្ទះ បន្ទាប់ពីការសិក្សា រៀនសូត្រ
ជាកិច្ចបន្ទាប់ សាខាកក្រក បានប្រគល់សៀវភៅចំណេះដឹងមូលដ្ឋានវិជ្ជា សង្គ្រោះបឋម ចំនួន ៥ក្បាល និងសម្ពាធវិជ្ជាសង្គ្រោះបឋមថ្មី ១ឈុត ។